Акутально

Къалэм гуащIафIэЗыужьыныгъэмрэ хыхьэхэкIымрэЕГЭ-м, ГИА-м теухуауэ

Рубрикэ: Тхыгъэхэр

Псэм и гупсысэ хэIэтыкIар

КъыщыдэкIа махуэр:

Театрым и Дунейпсо Махуэм Черкесск къалэм дэт къэрал филармонием щекIуэкIащ Къэбэрдей-Балъкъэрым щыщ режиссёр, продюсер цIэрыIуэ, Адыгэ Республикэм гъуазджэхэмкIэ щIыхь зиIэ и Iуэхузехьэ ЕмкIуж Андзор и творчествэм теухуа пшыхь. ГуфIэгъуэ дауэдапщэр къызэрагъэпэщащ мы гъэм Урысейм деж театрым и Илъэсу зэрыщытым, Къэбэрдей-Балъкъэрымрэ КъэрэшейЧеркесымрэ я зэкъуэшыныгъэр нэхъри гъэбыдэным, зыр-зым игъэлъэпIэным мы гъэр зэрытраухуам ипкъ иту. Зэкъуэш республикэхэм яхуэгъэза унафэхэр къахьащ хэгъуэгуитIым я Iэтащхьэ Темрезов Рэшидрэ КIуэкIуэ Казбекрэ.

Пшыхьыр ягъэхьэзыращ Байрамуковэ Хьэлимэт и цIэр зезыхьэ къэрал лъэпкъ библиотекэм и лэжьакIуэхэм, КъЧР-м щэнхабзэмкIэ и Министерствэр я щIэгъэкъуэну. ЕмкIужым и творчествэм хуэгъэпса пшыхьым къеблэгъащ КъБР, КъЧР, АР-м къикIа лIыкIуэхэр, жылагъуэ зэгухьэныгъэхэм я унафэщIхэр, ди хэгъуэгум щыIэ театрхэм щылажьэхэр, режиссёрым и творчествэр фIыуэ зылъагъу театреплъхэр. Шэчыншэу, ЕмкIуж Андзор лъэпкъ театрым хэлъхьэныгъэшхуэ хуэзыщI режиссёр ныбжьыщIэщ. Абы игъэува спектаклхэм сыт щыгъуи нагъыщэ лъагэхэр къалъэщ, ахэр цIыхубэм я гум дохьэ, гукъинэж ящохъу. ЕмкIужым и спектаклхэр Адыгэ, Къэбэрдей-Балъкъэр, Къэрэшей-Черкес, Кърым Республикэхэм, Краснодар къалэм щагъэлъэгъуащ. Дэнэ дежи абыхэм цIыхухэр куэду зэхуашэс, залым щIэмыхуэу кърашалIэ. Уеблэмэ, тIэу, щэ зы гъэлъэгъуэныгъэм къытрагъэзэжурэ еплъахэри мащIэкъым. Нэхъыщхьэр аращи, спектаклхэр адыгэбзэкIэ гъэуващ.

№ 25 4.04.2019