Хэхыныгъэхэм я мыхьэнэр къыбгурыIуэныр куэд и уасэщ. Куэд мыщIэуи зыуэ щыт махуэ хэхыныгъэхэр екІуэкІынущ. Сыт хуэдэ гупсысэкІэ абы дызэрекІуэлІапхъэр? Сыт хуэдэ бгъэдыхьэкІэ цІыхум а Іуэхум хуиІэн хуейр? ЖыпІэнурамэ, лэжьыгъэр уардэщ икІи абы зэхэщІыкІыныгъэ лъагэкІэ дыбгъэдыхьэн хуейщ. Апщыгъуэми, лейкъым цІыху цІэрыІуэхэм, ІуэхущІафэ, лэжьыгъэ зэхуэмыдэхэм пэрытхэм, пашэхэм я гупсысэхэм дыщыгъуэзэнри.
МАХМАДОВ Зафар: Урысей дзюдоист, Европэ чемпионатым, Универсиадэм я саугъэт нэхъыщхьэр къэзыхьа, Европэм и Кубокыр къэзылъэща, 2010 гъэм екІуэкІа Дунейпсо чемпионатым хэта, Урысейм лъэпкъыбэ классымкІэ спортым и мастер.
Мы зэманым Махмадовыр Черкесск къалэ мэрием егъэджэныгъэмкІэ и Управленэм и унафэщІым и къуэдзэщ. Шэч хэлъкъыми, апхуэдиз зылъэгъуа, жылагъуэ, къэрал, хэгъуэгу гъащІэм, политикэм, спортым щымыхамэ цІыхур хэхыныгъэхэми акъыл гъэтІысакІэ бгъэдохьэ, и псалъэри зэпэшэчащ.
Зафар цІыхубэр къыхуреджэ мы Іуэхум гунэфу хущымытыным, я граждан къалэныр хэхыгъуэ махуэхэм ягъэзэщІэным.
— Хэти ди къалэну къызолъытэ хэхыпІэ участкэхэм декІуалІэу, ди дзыхь зэдгъэз депутатыр дгъэнэІуэныр. Хэхыныгъэхэр зэІухащ, нэрылъагъущ, псори нэІурытщи, апхуэдэ лъэкІыныгъэфІыр къэдгъэсэбэпын хуейщ.
Къапщтэмэ, хэхыныгъэхэр спорт зэхьэзэхуэхэм зыгуэркІэ изогъэщхь. ТІум дежи кІэлъыплъакІуэмрэ хьэрхуэрэгъумрэ куэдщ. Апхуэдэ щытыкІэм къегъэув спорт, политикэ зэхьэзэхуэхэр, хэхыныгъэхэр пэжыгъэмрэ захуагъэмрэ тету къызэгъэпэщауэ щытынри, ар и лъабжьэу екІуэкІынри.
Езы кандидатхэми ар къагурыІуэн хуейщ. Абы къикІыр аращи, я политикэ зэпэщІэтыныгъэр гуащІэу, ауэ хабзэр и лъабжьэу ирагъэкІуэкІыпхъэщ. Кандидатхэм я зэпэщІэтыныгъэр дяпэкІэ я лэжьыгъэм щхьэпэну, сэбэп хуэхъуну лъэныкъуэу къызолъытэ. Щапхъэ зэтрахынущ, щхьэж и лэжьыгъэм и щыщІагъэ е и нэхъыфІ лъэныкъуэ къыхилъагъукІынущ. А псори, икІэм-икІэжым, жылагъуэм, хэгъуэгум, къэралым сэбэп хуэхъунущ, я гуащІэм хъерррэ гъерэтрэ къыпэкІуэу лэжьэнущ. АтІэ, иреспорт, иреполитикэ — хабзэр зыщ: е уи зэфІэкІ уемыблэжу уолажьэ, е къыптокІуэ! Апхуэдэщ сэ хэхыныгъэ Іуэхум сызэреплъыр.