Росгвардием Къэрэшей-Черкесым щиIэ Управленэм лицензионно-разрешительнэ лэжьыгъэмкIэ Купсэм и унафэщI, Управленэм и унафэщIым и къуэдзэ, полицэм и полковник Чомаев Эдуард иджыблагъэ яIущIащ ди хэгъуэгум и журналистхэм.
Офицерым хъыбарегъащIэ Iэмалхэм и лэжьакIуэхэр щигъэгъуэзащ цIыхухэм Iэщэ хъумэнымрэ зехьэнымрэкIэ хуагъэува хабзэхэр мыгъэзэщIэным жэуаплыгъэу къыпэкIуэм, гурыIуэгъуэ ящищIащ Iэщэмрэ абы щIыгъу шэгынхэмрэ къыдэхынымкIэ лицензэ зэращI щIыкIэр.
Абы къинэмыщIауэ, полицэм и полковникыр къахутепсэлъыхьащ электроннэ IэмалкIэ Iэщэ зыIэрызыгъыхьэну хуейхэм зэхуахьэс тхылъхэм, щхьэхуэу къытеувыIащ къекIуэкI хабзэ зэхэтыкIэм зэхъуэкIыныгъэу халъхьам.
Урысей Федерацэм щыпсэу цIыхухэм хабзэкIэ къыдаха Iэщэмрэ шэгынхэмрэ IункIыбзэ етакIэ щахъумэн хуейщ я унэм хэт сейфхэм, гъущI шкафхэм е пкъыгъуэ быдэхэм къыхэщIыкIа, гъущI IувкIэ къеукIэкIа пхъэ ашычхэм. Абыхэм зыри емыкIуэлIэфу, Iэщэмрэ шэгынхэмрэ я шынагъуэншагъэр къызэрагъэпэщу щытыпхъэщ.
2021 гъэм мэкъуэуэгъуэм (июным) и 28-м къыдагъэкIа, зи №232-ФЗ «Урысей Федерацэм и Кодексым административнэ хабзэкъутэныгъэхэм ятеухуауэ халъхьа зэхъуэкIыныгъэхэр» Федеральнэ унафэм зэритымкIэ, УФ-м и административнэ кодексым зэхъуэкIыныгъэ къыщыхъуащ Iэщэ зыщэхэм, тыгъэу зытхэм къагъэщI административнэ хабзэкъутэныгъэхэм я жэуаплыгъэр щIэгъэхуэбжьэным тещIыхьауэ.
«Iэщэм теухуауэ» Федеральнэ унафэм ипкъ иту, Урысей Федерацэм и цIыхухэм хабзэкIэ къыдаха я Iэщэхэр къагъэсэбэпыну хуитщ я гъащIэм шынагъуэ къахуэзыхь гуэр къалъыкъуэкIамэ, я узыншагъэр, мылъкуу ябгъэдэлъыр Iэмал имыIэу яхъумэну къахудэхуамэ.
ХабзэкIэ Iэщэ къыдэзыхам икIи зезыхьэм ищIэ мыхъунухэм ящыщщ:
- Iэщэр къигъэсэбэп хъунукъым фадэ Iухуауэ.
- ЦIыху куэд здэзэхыхьэ дауэдапщэхэм Iэщэ здахьу къыхуадэнукъым, а Iуэхугъуэм хэтхэм щымыхъукIэ:
— щэнхабзэ-нэгузыужь е нэгъуэщI дауэдапщэхэм хэлэжьыхьхэм;
— къулыкъу фащэ зыщыгъ, Iэщэ зыIыгъыну хуитыныгъэ зиIэхэм;
— спорт щыгъынкIэ хуэпауэ зэхьэзэхуэхэм, къэзакъ зэгухьэныгъэхэм ирагъэкIуэкI зэхыхьэхэм хэтхэм;
— жылагъуэ зэгурыIуэныгъэмрэ цIыхухэм я шынагъуэншагъэмрэ къызэзыгъэпэщ къулыкъущIэхэм.
«Iэщэм теухуауэ» Федеральнэ унафэм къызэрыщыхьащи, щэнхабзэ-нэгузыужь е спорт дауэдапщэхэр къызэзыгъэпэщхэм хуитыныгъэ ират пIалъэкIэ цIыхухэм я Iэщэхэр яхъумэну.
- Псэ зыIут, нэгъуэщI-къинэмыщI гуэрым еуэн, цIыхубэм гу зылърагъэтэну ягъэуэн папщIэ, пасэрей (антиквар) Iэщэхэр зэрахьэу хабзэм идэкъым.
- КъинэмыщIауэ, щэнхабзэ мыхьэнэ зиIэ, ауэ пасэрейхэм (антиквар) ящымыщ Iэщэхэри къагъэсэбэпыну хуиткъым.
Хабзэм ебакъуэу Iэщэ къэзыгъэсэбэпхэр административнэ е уголовнэ жэуаплыгъэ ирашэлIэнущ, жылагъуэм, къэралым, цIыхухэм я гъащIэмрэ узыншагъэмрэ зэрану ирахам елъытауэ.
ЗэIущIэм и кIэм хуэкIуэу, Чомаев Эдуард журналистхэм фIыщIэ яхуищIащ къулыкъущIэхэм я лэжьыгъэр нэгъэсауэ щIэджыкIакIуэхэм я пащхьэ зэрыралъхьэм папщIэ.
ЛЫХЬ Тимур