Мыхьэнэ зиIэ Унафэхэр
Къэралым и хэгъуэгухэм социально-экономи­кэ дэІэпыкъуныгъэ ягъэгъуэтыным теухуауэ иджыблагъэ УФ-м и Президент Путин Владимир иригъэкІуэкІа зэІущІэм КъЧР-м и Іэтащхьэ Темрезов Рэшид, Правительствэм и лІыкІуэхэр хэтащ.
Президентым къэралым и цІыху къэскІэ ехьэлІа, мыхьэнэшхуэ зиІэ унафэхэр къихьащ. Ахэр зытеухуар хэгъуэгухэм социально-экономикэ зэІузэпэщыр къы­щызэгъэпэщыныр и лъабжьэу цІыхубэм, хьэрычэ­тым защІэгъэкъуэнращ.
Апхуэдэ Іэмалхэщ МРОТ-р, цІыхур зэрыпсэуфыну ахъ­шэ нэхъ мащІэ дыдэ мар­дэр, бюджетым и лэжьакІуэхэм я улахуэхэр, социальнэ ахъшэхэр, пособэхэмрэ пенсэхэмрэ хэгъэхъуэныр.
Абы къыдэкІуэу сабий зиІэ унагъуэхэм, лэжьапІэншэу къэнахэм дэІэпыкъу­ныгъэ ирагъэгъуэтынущ. Антикризис кІуэрабгъухэми, хыхьэхэкІым, къинэмыщІ къулыкъущІапІэхэми зэра­дэІэпыкъунум ирипсэлъащ.
«А Іэмалхэр — Урысейм и экономикэм и лъэр щІэзы­удыну хуежьэхэм, санкцэхэр къезыхьэжьэхэм ятт жэуап быдэщ. Урысейм дяпэкІэ нэхъри зиужьыным и лъэбакъуэщІэ тчауэ къы­золъытэ. Президентым къызэрыхигъэщащи, къытхуа­гъэув текъузэныгъэхэм дапэджэжын хуейщ хьэрычэ­тым хуитыныгъэмрэ сэбэп къэзыхьыну жэрдэмхэмрэ ядэтщтэкІэрэ.
Ди къалэн пажэр —дгъэнэІуа Iуэхухэр дгъэзэщIэн­ращ. Къэрэшей — Черкесым и гугъу пщІымэ, социальнэ къалэну зыхуэдгъэува псори дгъэзэщІэнущ, проект­хэр пхыдгъэкІынущ. Ар къыдэхъулІэным щхьэпэнущ властри, хьэрычэтри, жылагъуэри зэрыубыду зэдэлажьэмэ. Іуэху инхэр къыт­пэщытщ, ауэ апхуэдэ щы­тыкІэм узыпэмыплъа лъагапІэхэм ухуашэ. Дылэжьэнущ!» — Телеграм каналым щетх КъЧР-м и Іэтащхьэм.
КъЧР-м и Iэтащхьэмрэ и Правительствэмрэ я пресс-къулыкъу