ДэIэпыкъуныгъэ Iэмалхэр

Ростуризмэм и пашэ Догузовэ Заринэ Къэрал Думэм туризмэмкІэ и Комитетым и зэІущІэм деж щигъэнэІуащ туризм къудамэм ехьэлІауэ къащта антикризис япэ Іэмалхэр. Апхуэдэу, лъэпкъ проектыр и лъабжьэу, мы гъэм пхагъэкІыну лэжьыгъэхэр:

— цІыху мелуаным щІигъум турист кешбэк программэр къагъэсэбэпыфынущ;

— РСВ-м, «ЩIэныгъэ» обществэм я зэхьэзэхуэ утыкухэм хэта, щытекІуа нэрыбгэ мин 50-м щІигъум лъэкІыныгъэ ягъуэ­тынущ къэралым и плІанэпэ зэхуэмы­дэхэм пщІэншэу зыщаплъыхьыну;

— хэгъуэгухэм къаІэрыхьа субсидиехэм я фІыщІэкІэ, еджакІуэ мини 100 пщІэншэу щІэнхабзэ-щІэнгъуазэ зэхэзекІуэ ежьэнущ;

— хьэрычэтыщІэ 800-м нэсым туриз­мэм епха проектхэр пхагъэкІыным теу­хуа грантхэр иратынущ. Апхуэдэ проект­хэр зытеухуар кемпингхэр, автокемпинг­хэр, зекІуапІэ-зыплъыхьыпІэ гъуэгухэр, псы Іуфэ зыгъэпскІыпІэхэр, нэгъуэщІ щІыпІэхэмрэ Іэмал къулейхэмрэ къызэгъэпэщынращ.

Къалэ 12-м я утыкухэр дахэу, къулейуэ, туристхэмкІи, машинэхэмкІи шынагъуэн­шэрэ тыншу щызэтрагъэпсыхьынущ.

ХьэщІэщ къудамэм щылажьэхэм папщIи хьэкълыкъ хуэгъэкІуэтэныгъэхэр щыІэнущ. Сабий кешбэкми егупсысауэ гъатхэ гъэмахуэ зыгъэпсэхугъуэ пІалъэм екІуэлІэнущ.

Туризм хыхьэхэкІ цIыкІумрэ ику итымрэ (МСП) папщІэ:

— кредит каникулхэр мази 6 хуащІащ. Апхуэдэ лъэкІыныгъэр къэзыгъэсэбэпы­фынур мы гъэм гъатхэпэм (мартым) и 1-м нэгъунэ кредит зэгурыІуэныгъэ зыщІахэращ. Ауэ банкым хуэгъэкІуэтэныгъэхэм я ІуэхукІэ мы гъэм фокІадэм (сентябрым) и 30-м нэгъунэ зыхуагъазэ хъунущ.

— Урысей Банкымрэ МСП Корпорацэмрэ я жэрдэм хуэгъэкІуэтэныгъэ дэІэпыкъуныгъэ программэхэр лэжьэнущ.

«Антикризис программэ»-м и фІыщІэкІэ кредитым техуэ процентыр 8,5-м нэсщ зэрыхъур.

ШЫБЗЫХЪУЭ Ирэ