Мэлыжьыхьым (апрелым) и 3-м Къэрэшей-Черкес Республикэм и военнэ комиссар Белобородов Сергей республикэм и цІыхубэ хъыбарегъащІэ Іэмалхэм я журналистхэм зэІущІэ ядригъэкІуэкІащ.
ЗэІущІэр теухуауэ щытащ гъатхэ къулыкъу дэшыгъуэ кампанэм.
—Мы гъэм гъатхэпэм(мартым) и 30-м УФ-м и Президент Путин Владимир Владимирович Іэпэ зыщІидза Унафэм ипкъ иту, мэлыжьыхьым (апрелым) и 1-м щІидзащ гъатхэ къулыкъу дэшыгъуэ кампанэр. Ар ди хэгъуэгум щекІуэкІынущ мэлыжьыхьым и 1-м щегъэжьауэ бадзэуэгъуэм (июлым) и 15-м нэгъунэ.
Урысей Федерацэм псори зэхэту мини 147-рэ къулыкъум дашынущ. Абы щыщу нэрыбгэ 300-м щІигъу Къэрэшей-Черкес Республикэм икІынущ,—жиІащ республикэм и военкомым.